गोवळकोट-पेठमाप-नजरेकाशी-चिपळूण या भागाचे जागृत देवस्थान व पटवर्धन, गोळे, दीक्षित आदि घराण्याची कुलदेवता व शेरणे काढण्याची महती असलेली, तीनही गावांचे एकजुटीचे प्रतीक असलेली भव्य जत्रा, व गुलाल मुक्त शिमगा, यामुळे अवघ्या महाराष्ट्रात प्रसिद्ध असलेले आणि प्राचीन इतिहास असलेले श्री देव सोमेश्वर व श्री देवी करंजेश्वरी चे हे देवस्थान !

श्री करंजेश्वरी देवीचे रूप अत्यंत लावण्यपूर्ण, देखणे आणि तेजस्वी आहे. देवीच्या नेत्रात हजारो मातांचे वात्सल्य भाव ओसंडून वाहताना दिसते. देवीची मूर्ती चतुर्भुज आहे. भक्तांचे रक्षण करण्यासाठी एका हातात खड्ग, एका हातात ढाल, एका हातात कुंकवाचा करंडा आणि एक हात सदैव आशीर्वादाचा आहे. अंगावर सुवर्णभूषणे आहेत. कधी देवी नऊवारी साडीत तर कधी कुमारिकेच्या रूपात दृष्टांत देते. करंजेश्वरी देवी साक्षात आदिशक्ती पार्वतीचे रूप आहे अशी भाविकांची श्रद्धा आहे. ती करंजीच्या झाडात प्रगट झाली म्हणून तिच्या भक्तांनी करंजीचे तेल वापरू नये, असा संकेत आहे. श्री. पटवर्धन, श्री. गोळे, श्री. दीक्षित, श्री. फणसे, श्री. पुराणिक आदि मान्यवर घराण्यांची ती कुलदेवता आहे. उच्च कोटीतील समजला जाणारा नवचंडी याग तिच्या चरणी समर्पित करून कुळभक्त देवीच्या दर्शनाने कृतार्थ होतात. देश परदेशात देवीचे अगणित भक्तगण आहेत. श्री करंजेश्वरी देवी शाकाहारी आहे त्यामुळे देवस्थानाच्या आवारात धान्य वाळत घातले असता देवळाच्या अंगणात कोणताही पक्षी अथवा कोंबडा/ कोंबडी फिरताना दिसणार नाही, असा देवीचा महिमा आहे. देवीचे निशाण – ढोलकाठी म्हणजे देवीचा राखणदार आहे. मंदिराकडे तोंड करून उभे राहिले असता, मंदिराच्या बाहेर उजव्या बाजूस त्यांचे स्थान आहे.